BAGUIO CITY – Dumanon iti 28 a sidewalk ditoy siudad ti Baguio ti isimsimpa ken pappapintasen ita ti Department of Public Works and Highways (DPWH) – Baguio City District Engineering Office.
Sigun kenni Engr. Glenn Reyes, Assistant City District Engineer, karaman ditoy dagiti sidewalks a masarakan sadiay Leonard Wood Road, Lake Drive, Magsaysay Avenue, General Luna Road, F. Calderon Street, Zandueta Street ken dadduma pay.
Imbinglayna nga adu ti patrabahoda a sidewalks iti central business district kas maitunos metlaeng iti tarigagay ti lokal a gobierno a papintasen ken pabaruen dagiti nasao a pagnaan.
Dinakamatna a kasapulan ti panakapapintas dagiti sidewalks tapno agbalin a natalged, komportable a pagnaan ken makaay-ayo iti imatang dagiti agaramat kadagitoy.
Naamuan a dumanon iti 95 ti patrabaho ti DPWH-Baguio, pakairamanan ti panakapalawa dagiti kalsada iti nagduduma a paset ti siudad, sidewalks ken dadduma pay.
