Tiniliw ti National Bureau of Investigation (NBI) – Cordillera ti 28-anyos a suspek idiay People’s Park, Session Road, Baguio City idi kalman, Abril 16 bayat ti panang-awatna iti P95-K a cash settlement manipud iti 29-anyos a call center agent.
Ti suspek ket babai ken tubo ti Mt. Province.
Maibasar iti report, nagdawat ti suspek ti kwarta iti biktima tapno saanen a mangipila ti kaso kontra iti biktima gapu iti maatap a panangiwarasna iti social media kadagiti saan a pudno a bambanag maipapan kenkuana ken iti nobyona.
Naammoan a ti nobyo ti suspek ket sigud a nobyo ti biktima ken maibagbaga a nagtaud iti naimpluwensiya a pamilya idiay Benguet.
Nupay kasta, impetteng ti biktima a saan nga isuna ti nangdadael iti suspek ken iti sigud a nobyona agsipud ta naikompromiso ti accountna iti social media.
Kinunana nga adda ti sabali a nang-aramat iti profile na tapno makontak ti suspek ken ti nobyono.
Iti baet daytoy, nangipaay latta ti biktima ti P15-K iti suspek tapno sumardengen ken saanen a dumakkel pay ti isyu.
Nupay kasta, saan a napnek ti suspek ken dagiti dadduma pay a kadwana iti naawatna a P15-K manipud iti biktima rason a nagdawat manen ti P95-K.
Ditoy metten a napagdesisyonan ti biktima nga agkammang kadagiti otoridad.
Napagnunumoan nga isabat ti biktima ti makidkiddaw kenkuana a gatad ken ditoy metten a natiliw ti suspek.
