BAGUIO CITY – Nadangran ti duapulo ket walo a tattao iti panakatinnag ti naglugananda a jeep nga addaan iti plaka nga AYP 261 iti deraas sadiay Midas, Ucab, Itogon, Benguet itay malem.
Segun kenni Itogon Mayor Victorio Palangdan, dagiti nadangran ket bin-ig a residente ti Piging ken Baayan sadiay Barangay Ucab a dagus met a naitaray iti ospital.
Kinuna met ni PSI Jeffrey Vicente, chief of police ti Itogon Police, a maysa ti kritikal kadagiti biktima a maobobserbaran ita iti ospital.
Kinunana a naggapo iti lamay sadiay Barangay Batuang dagiti biktima idi napasamak ti aksidente.
Kinuna met ni Ucab Punong Barangay Marienito Lisayen a pasang-at iti kalsada ti nasao a jeep idi killaat daytoy a nagsardeng agingga a natinnag iti rangkis nga aguneg iti mapattapatta a nasurok kumurang duapulo a metro.
Iti agdama ket agtultuloy ti imbestigasyon ti pulisya iti nasao nga aksidente.
