BAGUIO CITY- Agtultuloy nga im-imbestigaran dagiti pulis ti tallo a nagsisina nga aksidente kadagiti kalsada ditoy rehion Cordillera idi kalman.
Immuna a nailista ti panakaidungpar ti maysa a ford fierra iti igid ti kalsada wenno parapet sadiay Sagada, Mt. Province kalpasan a naaddaan daytoy ti mechanical defect bayat ti panagbiaheda iti nasao a lugar.
Nangitunda daytoy iti panakadunor ti uppat kadagiti 14 a pasahero ti nasao a lugan.
Nabigbig dagiti nadangran a da Jenny Corvera, Ahliza Brosas, Juan Magoling ken Juvy Rose Barcenas a bin-ig a turista sadiay.
Nadangran met ti tallo a French nationals kalpasan a natulid iti kalsada sadiay Batad, Banaue, Ifugao ti nagluganan dagitoy a ford everest.
Nabigbig dagitoy a da Sylviane Andreutti, 66-anyos; Nathalie Guillard, 46-anyos; ken Valerie Ferchaud, 52-anyos bayat a nadangran pay dagiti kaduada a tour guide a ni Terence Ab-abulon, 19-anyos ken ti driver a ni Elvis Dumawol, 36-anyos a maysa metlaeng a tour guide.
Naamuan a pasalog iti kalsada ti nasao a lugan idi napukaw ti preno daytoy agingga a napukaw ti driver ti kontrol iti manibela a nagresulta iti panakatulid ti lugan iti kalsada.
Kabayatanna, agpapaimbag pay iti pagagasan dagiti 19 a pasahero ti maysa a parapasahero a jeep kalpasan a naidungpar daytoy iti maysa a waiting shed iti igid ti kalsada sadiay Hingyon, Ifugao.
Maibasar iti report, pasalog iti national road ti nasao a jeep a naglaon ti 22 a pasahero idi naaddaan ti mechanical defect.
Agpapada a resident iti probinsia ti Ifugao dagiti biktima bayat a nakaro a nadangran ti driver a nabigbig a ni Daniel Pugong, 54-anyos ken residente ti Banaue, Ifugao nga iti agdama ket matamtaming iti Ifugao General Hospital.
