Naisayangkat ti 2nd Quarter a Nationwide Simultaneous Earthquake Drill itay agsapa iti oras ti alas-9.
Iti pannakiuman kenni Engr. Jojo Valera, dadaulo iti Disaster Risk Reduction Management, inlawlawagna a ti kangrunaan a panggep ti earthquake drill ket tapno makessayan ti negatibo nga epekto ti ginggined babaen iti panangisuro kadagiti umili iti umno nga aramiden sakbay, kabayatan, ken kalpasan iti ginggined.
Impaganetgetna a tunggal biag ket napateg isut gapuna a masapul a maawatan ken maisuro iti publiko dagiti umno nga aramiden tapno masalakniban ti bukod a biag ken dagiti kameng ti pamilya iti oras ti trahedia.
Imbinglay pay ni Valera a dakkel ti partisipasion dagiti Local Government Units iti intero a Cordillera, gaputa nu adda iti drill ket agarup 95% dagiti LGUs ti agtultuloy a makiparpartisipar tapno mapigsa ti panagsaganada.
Innayon ti opisial a numan pay nakasagana dagiti ahensia iti panagresponde, saan a maipadto ti panagtama iti ginggined isut gapuna a napateg unay ti panagaramid kadagiti “preparedness measures” ken panangisuro iti publiko dagiti umno a maaramid.
Pinalagipanna met iti publiko a makipartisipar a siaayat ken tumulong iti panangibinglay kadagiti impormasion tapno magun-od ti natalged ken “resilient community” iti suidad. | via Bombo Khey
