BAGUIO CITY – Nakemmeg ti tallo a kameng ti maysa a pamilia a bin-ig a target listed personalities dagiti otoridad iti naipatungpal a drug raid sadiay Sinapangan, Bangued, Abra.
Nabigbig dagitoy a da Reymund Bayle, 35-anyos, tricycle driver; ti live-in partner daytoy a ni Marcela Imelda Belmonte, 44-anyos ken ti anak daytoy a ni Christian JC Dungca, 23-anyos.
Nakemmeg dagitoy kalpasan a nagpositibo ti panakaiserbi ti search warrant operation iti pagtaenganda.
Sinukimat dagiti otoridad ti nasao a balay ken nakumpiskar manipud iti kuarto ti aglive-in partner ti siam a pakete ti shabu nga aggatad iti P68,000.
Narekober met laeng manipud kadagiti suspek dagiti drug paraphernalia.
Nupay kasta, nainget a pinaglibakan dagiti suspek a kukuada dagiti narekober a kontrabando.
Naammuan a dagiti suspek ket high value targets ken ita ket sumangsangon dagitoy iti kaso a panaglabsing iti Comprehensive Dangerous Drugs act of 2002.
Maipalagip nga immunan a nakemmeg ni Bayle iti naipatungpal a drug raid idi February 2019 ngem nakaruar daytoy kalpasan a nakapiansa.
