BAGUIO CITY – Naireport iti tallo a kaso iti bullying kadagiti pagadalan iti siudad iti Baguio nu sadino maysa iti Pinget NHS, maysa iti Quezon Hill NHS, ken maysa idiay Dominican-Mirador.
Iti pannakiuman iti Bombo Radyo kenni Baguio City Mayor Benjamin Magalong, patienna nga adda pay dagiti kaso iti bullying a saan a naireport kadakuada.
Impeksa pay ni Mayor Magalong a masapol a maaddaan iti mandatory intervention dagiti ubbing a karaman iti insidente kasta met a masapol a mangipila iti civil case dagiti pamilya iti biktima tapno marikna dagiti ubbing a nakaaramid iti saan a nasayaat iti liability dagiti inaramidda.
Iti agdama, agtultuloy ti panagsarita dagiti kameng iti DepEd-CAR ken City Social Welfare nu anya dagiti interventions a mabalin nga ipatungpalda kadagiti ubbing a karaman iti nasao nga insidente.
Mangisayangkat metlaeng iti Information, Education, and Communication (IEC) program dagiti lokal nga ahensya ken makikoordinarda ti Parent Teacher Association tapno maireport dagiti ubbing a nangipakita iti kinaranggas tapno saan a baybay-an dagiti kapada nga isyu.
Imbinglay met ni Magalong a silulukat ti Bahay Pag-asa iti siudad para iti reformation dagiti ubbing nga addaan iti aggressive behavior.
Kabayatanna, inlawlawag ni Magalong ti naisayangkat a drill kontra iti aggressive behavior. Kinunana a saan nga amin a city high school ket nai-cover iti nasao a drill nu sadino tallo laeng a klasrum ti napili a nakaisayangkatan iti drill.
Sigun kenkuana, adu dagiti naadalda iti drill ken patienna a nakatulong daytoy kadagiti manursuro ken estudyante tapno mapagsaganaan dagiti posible a mapasamak iti masakbayan. Innayonna pay a masapol a mabantayan dagiti ubbing saan laeng dagiti addaan iti depression behavior nu di ket nangruna dagiti addaan iti aggressive bahavior tapno maliklikan dagiti insidente iti kinaranggas. | Bombo Khey Reparip