BAGUIO CITY – Nakasuan iti physical injury ti tallo a lallaki kalpasan a pinagtitinnulunganda a dangran ti maysa nga indibidual sadiay Camdas, Baguio City.
Nabigbig dagiti suspek a da Noel Austria, Raffy Austria ken Ronald Loyfoc, agpapada nga adda iti legal nga edad ken residente ti Camdas, Baguio City.
Nabigbig met ti biktimada a ni Joedel Lopez, tubo ti Sudipen, La Union ken residente ti Camdas, Baguio City.
Maibasar iti report, tinawagan ni Noel Austria ti biktima tapno alaenda ti kuarta a bulbuldenda kenkuana.
Nupay kasta, idi simmurot ti biktima kadagiti suspek ket pinagtitinnulonganda daytoy a dinangran.
Iti panagpatrolya ti maysa a barangay kagawad ket nakitana ti aksidente a nagresulta iti panakaiturong ti biktima iti ospital ken panakaipila ti kaso kontra kadagiti suspek. (-with Bombo Brigitte Marcasi)
