BAGUIO CITY–Sumango iti nagtutuon a kaso ti tallo a lallaki kalpasan a nakemmeg dagitoy iti nagsina nga entrapment operations ditoy siudad ti Baguio gapu iti maatap a panagilako dagitoy kadagiti peke a drivers’ license.
Nabigbig dagitoy a da Richard Allen Badua del Rio, 26-anyos; John Lawrence Fernandez Cercado, 22-anyos; ken Vilmor Garcia Wakit, 25-anyos.
Sigun kenni Police Master Sgt. Veronica Villareal, information officer ti Criminal Investigation and Detection Group-Cordillera, nakemmeg da Del Rio ken Cercado sadiay Barangay San Vicente bayat a nakemmeg ni Wakit iti asideg ti pagtaengan daytoy.
Kinuna ni Villareal a ti operasyon ket bunga ti panagpatulong kadakuada dagiti siyam a drivers kalpasan a naamiris dagitoy a peke dagiti naipaay a lisensia kadagitoy.
Iti salaysay dagiti biktima, impagarupda a fixer iti Land Transportation Office (LTO) ti nakatransaksionda, no sadino, nakaalada ti lisensia kasukat ti P4,000 kalpasan a bimmagsakda iti eksaminasyon ti LTo para kadagiti professional drivers.
Naduktalan a nakitransaksion da Del Rio ken Cercado kenni Wakit nga addaan am-ammo nga agar-aramid iti peke a lisensia sadiay Avenida, Manila.
Sumangsango ita dagiti tallo iti kaso a falsification of public document, estafa ken panaglabsing iti linteg ti Land Transportation.
Kagiddan iti daytoy, inyapela ni LTO-Cordillera regional director Francis Rae Almora ti direkta a panakitransaksion ti publiko iti opisina ti LTO ken ti panagsurotda iti legal a wagas iti panagala ti driver’s license.
