BAGUIO CITY – Nakemmeg ti tallo a lallaki a bin-ig a kameng ti maysa a criminal gang sadiay Abatan, Buguias, Benguet.
Nabigbig dagitoy a da Rosenio Pio, 19-anyos, minero ken Arnold Compalas, 23-anyos, mannalon, agpada a taga-Mankayan, Benguet ken ni Fred Mamayec, 33-anyos, mannalon ken residente ti Tadian, Mountain Province.
Nabigbig met ti biktima a ni Joshua Macasling, 25-anyos, mannalon ken residente ti Buguias, Benguet.
Sigun iti pulisya, imparada ti biktima ti motorsiklona iti asideg ti Barangay Hall ti Abatan tapnu mamigat iti kaasideg daytoy a panganan.
Nupay kasta, iti panagsublina iti ayan ti motorsiklona ket naklaat laengen daytoy gaputa saannan a nakita ti nasao a motorsiklo.
Gapu iti daytoy, dagus a nagpatulong ti biktima kadagiti pulis a dagus met a nangisayangkat ti Coplan Ghost Rider.
Nagresulta daytoy iti panakarekober ti nakataw a motorsiklo iti asideg ti maysa a gasolinaan ken iti panakakemmeg dagiti suspek.
Naamuan nga awan iti listaan dagiti pulis ti criminal gang dagiti suspek nga ita ket sumangsango iti kaskenan a kaso.
