BAGUIO CITY – Nakemmeg ti tallo a miembro ti notorious a Pineda Criminal Group a karaman iti serye ti robbery, carnapping, illegal drugs trade ken dadduma nga iligal nga aktibidad saiday Angeles City ken kabangibang daytoy a munisipyo babaen iti joint hot pursuit operation.
Sigun iti pulisya, dagitoy ti suspek iti robbery hold-up iti maysa a balay sadiay Bayacsan, Taloy Sur, Tuba, Benguet idi agsapa ti October 4, 2019 a nangitarayanda iti personal belongings ken cash nga aggatad amin iti nasurok P100,000 sakbayda a naglibas babaen iti maysa nga SUV.
Insayangkat dagiti operatiba ti Tuba Municipal Police Station ken Provincial Intelligence Branch ti Benguet PPO, ti CIDG-CFU Angeles, ti RHPU3 ken ti PIT/CIT Angeles RIU-3 ti nasao a joint hot pursuit operation.
Nakemmeg ni Lady Bundalian Ronquillo, 28-anyos ken residente ti Cutcut, Angeles City iti uneg ti maysa a lugan a nakaparada iti garahe sadiay Tabun, Angeles City.
Nakemmeg metlaeng ni Brian Gomez Baesa, 34-anyos ken residente ti San Jose, Angeles City kalpasan a nakorner daytoy kalpasan nga imbutaktak ni Ronquillo ti lokasyonna.
Nakemmeg pay ti maikatlo a suspek a ni Roland Mendoza Guevarra, 52-anyos ken residente ti Mexico, Pampanga kalpasan a nakorner daytoy sadiay kalpasan nga insuro metlaeng ni Baesa ti lokasyonna.
Sigun iti pulisya, nabigbig dagiti suspek babaen iti video footage.
Dinayaw met ni Cordillera Police regional drirector PBGen Israel Ephraim Dickson dagiti operatiba iti dagus a panakakemmeg dagiti suspek.
