Imbutaktak ni Senador Risa Hontiveros a dagiti tallo a Chinese POGO “bosses” ket mapapati a saan a nagsubli idiay China kasaruno ti report a naipasubli dagitoy iti nagtaudanda a pagilian.
Iti panagdinggeg ti Senate justice and human rights subcommittee, imbutaktak ni Hontiveros ti inawaganna a “modus” nu sadinno gumatang dagiti ganggannaet ti tiket ti eroplano nga addaan iti layover tapno makalisida.
Bayat ti panagdinggeg, kinuwestunar ti nasao a senador kadagiti opisial ti Bureau of Immigration seknan ti impormasion da Lyu Xun, Kong Xiangrui, ken Wang Shangle– dagit mapapati POGO bosses a naibilin a mapapanaw iti Pilipinas kalpasan a natiliw dagitoy bayat ti “raid” idiay Parañaque.
Dinamag ni Hontiveros ni BI Intelligence Division Chief Fortunato Manahan ken BI Legal Division Chief Arvin Cesar Santos tapno makumpirmar nu ti tiket dagiti tallo a Chinese nationals ket direct flight wenno transit flight.
Sigun kenni Manahan, ti “deportation” dagiti tallo a mapapati a POGO bosses ket ti kapartakan iti pakasaritaan ti BI ken naiproseso iti dua a lawas.
Inaklon ni Manahan a ti panaggatang ti airline tickets ket maysa kadagiti karit ti BI iti panangpapanaw kadagiti nakemmeg a ganggannaet manipod iti POGO, gaputa awan ti nailatang a pondo kadagitoy.
