BAGUIO CITY – Isimpan ti lokal a gobyerno ti Baguio dagiti kalsada ken walkways ditoy siudad kas maitunos iti nabukel a plano para iti panakarisut ti parikut iti trapiko ditoy lokalidad.
Sigun kenni Mayor Benjamin Magalong, ti plano ket resulta dagiti nagduduma nga obserbasyonda iti taray ti trapiko ditoy siudad.
Kinunana a maysa a paset ti plano ti panaka-aramid ti maysa nga L-shape walkway wenno pagnaan dagiti pedestrian iti sangwanan ti Justice Hall a manamnama a solosyon iti nadagsen a trapiko a pauneg iti Central Business District.
Innayonna a sadiay Lower Magsaysay ket mapagmaymaysa wenno mapagkonektar ti dua a flyover a paruar ken pauneg iti siudad ken mapagbalin a two-way scheme.
Maipasdek pay ti rangtay a mangikonektar iti Maya Street ken Aguila Street tapno manayonan ti aramaten dagiti motorista.
Naaprobaranen ti nasao a proyekto ken maisayangkat daytoy iti kabiitan a panawen.
