BAGUIO CITY – Nakemmeg ti tallo a drug personalities a suplayer ti iligal a droga kadagiti night entertainers ditoy lokalidad iti nagsaruno nga operasyon dagiti anti-drug operatives ditoy siudad ti Baguio.
Immuna a nakemmeg sadiay Magsaysay, Loakan Proper, Baguio City ti maysa a target listed drug personality a drug runner ken ti kakomplot daytoy iti naisayangkat a buy-bust operation idi Miyerkoles, September 2.
Nabigbig dagitoy a da Patrick Roger Catbagan, 33-anyos, taxi driver, residente ti South Sanitary Camp, Baguio City ken Maryjane Bautista Nunag, 28-anyos, bar entertainer, tubo ti Bacolor, Pampanga ken residente ti Magsaysay, Loakan Proper, Baguio City.
Nakumpiskar kadagitoy ti agarup P105,000 a gatad ti maatap a shabu ken nagduduma a drug paraphernalia.
Naipasidong iti surveillance ti dua kalpasan a naawat ti PDEA-Cordillera iti report a maatap a supsuplayan dagiti dua iti iligal a droga dagiti bar entertainers ditoy Baguio City.
Kabayatanna, nakemmeg met ti maysa pay a target listed drug personality iti buy-bust operation sadiay Cresencia Village, Baguio City.
Nabigbig daytoy a ni Esmeralda Bacani, drug runner ditoy siudad, no sadino, inlakona ti maatap a shabu nga aggatad ti P4,500 iti operatiba.
Kinuna ti PDEA-Cordillera a ti panakakemmeg dagiti tallo ti pammaneknek a maiwarwaras ti iligal a droga kadagiti balay paginuman iti lokalidad.
Sumangsango metten dagiti tallo iti kaso a panaglabsing iti RA 9165 wenno ti Comprehensive Dangerous Drugs Act of 2002.
