BAGUIO CITY – Balligi a nalpas dagiti 157 a baro a pulis ti Cordillera ti tallo a bulan a nainget a panagsanay dagitoy iti Basic Internal Security Operation Course ken naangay ti seremonya ti panagturposda sadiay Itogon, Benguet.
Panggep ti nasao a panagsanay a maisuro ken masanay dagiti pulis iti nagduduma a pamuspusan ken istratehiya iti combat operations ken maneuver skills ken maipasagepsep ti combat standard operating procedures kabayatan ti anti-insurgency operations, anti-criminality ken anti-terrorism.
Nabigbig kabayatan ti seremonya dagiti pulis a nakitaan ti outstanding performance kabayatan ti panagsanay dagitoy.
Dinayaw met ni PBGen. Lawrence Coop, Deputy Regional Director for Administration ti Police Regional Office Cordillera dagiti nasao a pulis gaputa nabaelanda a naileppas ti nainget a panagsanay.
Kinunana a babaen iti nasao a panagsanay ket mabalinen nga agsubli dagiti nasao a pulis iti bukodda a destino nga addaan ti baro nga skills ken knowledge a maaramatda iti panangaramidda iti mandatoda kas protector ti linak ken kappia iti rehion Cordillera.
