BAGUIO CITY – Nakemmeg ti tallo a drug personalities ditoy siudad ti Baguio iti impatungpal drug buy-bust operation ti Drug Enforcement Unit (DEU), City Intelligence Unit, PDEA, ken Baguio City Police Office Station 4 idi rabii.
Nabigbig dagitoy a da Luis Tamolang Camba, 42, tubo ti Pangasinan; Jose Sotiangco Rualo Jr., 38, ken residente ti Loakan, Baguio City; ken ni Ariel Ander Olegario, 29, ken residente ti Hangar Market, Baguio City.
Iti panakiuman ti Bombo Radyo, kinuna ni PCI Nicomedes Olarte, dadaulo ti DEU, a ti nasao nga operasyon ket nairangta para kada Camba ken Rualo ngem naranaanda ni Olegario a kadwa dagiti suspek.
Kinunana a nabayag a binanbantayanda dagiti nasao a suspek gaputa dagitoy ti mangisangsang-at kadagiti shabu ditoy siudad ti Baguio manipud iti lowlands.
Narekober kenni Rualo ti uppat a transparent plastic sachet a naglaon iti maatap a shabu, P500 genuine bill, ken nagduduma a drug paraphernalia bayat a narekober kenni Olegario ti dua a sachet a naglaon iti maatap a shabu.
Nakumpiskar pay iti balay ni Rualo ti uniporme ti soldado, t-shirt ti CIDG, baby armalite ken caliber 45 a paltog.
Maipalagip a ni Olegario ti maysa kadagiti nakalasat iti pammaltog sadiay Tuba, Benguet idi Disyembre ti napalabas a tawen.
Naidatagan daytoy iti kaso ngem nakaruar iti pagbaludan kalpasan a nagpiyansa.
