BAGUIO CITY – Nakastrek ti tallo a kadete manipud rehion Cordillera iti Top 10 ti Philippine National Police Academy (PNPA) Magiting At Responsableng Alagad ng Batas na Gagabay sa Transpormasyong Alay sa Bayang Sinilangan (MARAGTAS) Class of 2018.
Nagun-od ti 24-anyos a ni Police Cadet Francis Pang-ay Fagkang manipud Sacasacan, Sadanga, Mt. Province ti maikadua a pwesto.
Gapu iti daytoy, maawatna ti Vice Presidential Kampilan Award ken ti Plaque of Merit manipud kenni Vice President Leni Robredo.
Nagun-od met ni Police Cadet Jess Torres Agustin manipud Anchokey, Kabayan, Benguet ti maikatlo a pwesto isut gapuna a maawatna ti Secretary of the Interior and Local Government (SILG) Kampilan Award ken ti plaque of merit gapu iti panagturposna iti maikatlo a pwesto iti order of merit.
Nagun-od met ni Fire Cadet Myrick Aquino Paldingan manipud Mankayan, Benguet ti maikalima a pwesto.
Maipalagip a ti PNPA MARAGTAS Class of 2018 ket idualuan ni Police Cadet Fritz John Napalinga Vallador manipud Kabankalan City, Negros Occidental a makaawat iti Presidential Kampilan Award ken Plaque of Merit manipud kenni President Rodrigo Duterte.
Naamuan a ti PNPA MARAGTAS Class of 2018 ket bukbuklen ti 79 a lallaki ken 27 a babbae; 76 kadagitoy ti sumrek iti Philippine National Police bayat a 13 ti agserbi iti Bureau of Jail Management and Penology ken 17 ti sumrek iti Bureau of Fire Protection.
Naituding ti panagturpos dagitoy inton March 21.
