BAGUIO CITY – Sumangsango iti kaso a frustrated homicide ti maysa a laborer kalpasan a tinagtagbatna ti tallo a kakadwana sadiay Sadag, Bahong, La Trinidad, Benguet idi rabii.
Nabigbig ti suspek a ni Regie Baguiwon alyas Jordan, 21, tubo ti Nueva Viscaya bayat a dagiti biktima ket da Jerick Velasco Collado, 20, tubo ti Nueva Ecija; Ricky Bostillos Eugenio, 41, ken ni Roberto Ramirez Cadac, 33, agpada a tubo ti Nueva Viscaya.
Segun iti La Trinidad PNP, agiinom dagiti tallo a biktima iti uneg ti pagdagdagusanda a balay idi simmangpet ti nabartek a suspek ken tinagtagbatna ti diding ti balay.
Rimuar ni Cadac tapnu saludsodenna kuma ti pagung-ungtan ti suspek ngem tinagbat ti suspek ti rupa, abaga ken saka daytoy.
Rimuar met dagiti dua a kadwa ni Cadac ngem tinagbat dagitoy ti suspek, ket nagsagrap ni Collado ken maysa a tagbat iti likod ti lapayagna ken maysa met a tagbat iti rupa ni Eugenio.
Naitaray dagiti biktima iti ospital bayat a kinemmeg dagiti nagresponde a pulis ti suspek.
Iti met panakiuman ti Bombo Radyo ket inaklon ti suspek a nakainom daytoy ken saanna nga ammo ti inaramidna.
Nupay kasta, impettengna a dagiti tallo a biktima ti nangirugi iti gulo ken bimmales laeng daytoy.
