BAGUIO CITY – Nakemmeg tallo nga indibidwal kalpasan a naaktoan dagitoy nga agsugsugal iti parking area ti maysa a pagtagilakoan ditoy siudad ti Baguio.
Nabigbig dagitoy a da Raymond Operario Batang, 32- anyos, residente ti Pinget, Baguio City; Alejandro Bienes Besa, 52-anyos, residente ti South Sanitary Camp; ken ni Alejandro Galvan Quebate, 61-anyos ken residente ti Crystal Cave, Baguio City.
Maibasar iti blotter ti pulisya, nakaawat iti report dagiti pulis nga adda ti agsugsugal iti billiard hall iti nasao a parking area isut gapuna a dagus dagitoy a nagturong sadiay.
Iti panagresponde ti grupo ni PIns. Odalon Osorio ket naaktuanda dagiti suspek a manarimaan ti panagsugalda iti tong-its isut gapuna a dagus a kinemmegda dagitoy.
Naala metlaeng kadakuada ti baraha ken ti taya dagitoy a P750.00.
Sumangsango dagitoy iti kaso a pananglabsing iti Presidential Decree 1602 wenno ti illegal gambling.
Maipalagip nga immunan nga indeklara ni PNP Chief Police Director General Ronald Dela Rosa ti all out war kontra iti iligal a sugal.
