BAGUIO CITY – Sumangsango iti kaso nga attempted kidnapping ti tallo a lallaki a nanggandat a mang-kidnap wenno mangkawtibo iti maysa nga onse-anyos a lalaki sadiay Pasil, Kalinga idi rabii.
Nabigbig dagiti suspek a da John Rey Pedrosa manipud Laguna, Michael Perilla manipud Oriental Mindoro ken Ronald Melanis manipud Sorsogon.
Nabigbig met ti biktima a ni Bryner Silagan, estudyante ti Grade 6 ken residente ti Balinciagao Norte, Pasil, Kalinga.
Sigun iti Pasil Municipal Police Station, ginandat dagiti suspek nga iserrek iti naglulugananda a 6-wheeler container van truck ti biktima babaen iti pananggammat ken panangiguyodda iti biktima.
Nupay kasta, nabaelan ti barito a nakaruk-at ken nakalibas ken dagus a nagkamang iti pulisya.
Nakemmeg dagiti tallo iti naisayangkat a hot pursuit operation dagiti pulis ken militar iti tulong dagiti umili sadiay.
Naamuan a ti lugan dagiti suspek ket nakanagan iti mays a korporasyon sadiay Siniloan, Laguna.
