Dumanon iti tallo a milion nga estudiante ti agkasapulan ti tulong gapu iti learning gaps, sigun iti assessment ti Department of Education (DepEd).
Daytoy ket kinuna ti nasao nga ahensia kalpasan a natakuatan ti Philippine Statistics Authority ti 5.58 a milion a nagturpos iti high school nga “functionally illiterate” wenno addaan parikut iti “comprehension” ken “understanding.”
Sigun kenni DepEd Undersecretary Gina Gonong, adu dagiti rason nu apay a saan a makaad-adal dagiti estudiante, isut gapuna a kasapulan nga agtinnulong ti manursuro ken nagannak tapno maragpatda ti umno a pannakaamo ken skills a kasapulan a maadalda.
Kabayatanna, panggep ti Academic Recovery and Learning (ARAL) Program ti Department of Education a marisut dagiti learning gaps a rason kadagiti parikut iti panagsursuro ken “comprehension.”
Naibilin ti nasao a programa babaen ti Republic Act 12028, a pinirmaan ni President Ferdinand Marcos Jr. idi Oktubre 2024.
