BAGUIO CITY – Agtultuloy ti nainget a kampanya dagiti pulis iti rehion Cordillera kontra kadagiti iligal ken awanan ti lisensia a paltog.
Nagresulta daytoy iti panakakemmeg ti tallo nga indibidual a nakaimet iti paltog a naglabsing iti Comprehensive Firearms and Ammunition Regulation Act, panakakumpiskar ken panakaisuko ti 12 a nagduduma a paltog ken 269 a bala.
Sigun iti Cordillera PNP, iti siyam a nagduduma nga operasyon ket nakumpiskar ti tallo a nagduduma a paltog ken nakemmeg ti dua nga indibidual sadiay Kalinga bayat a nakumpiskar ti dua a paltoh ken nakemmeg ti maysa nga indibidual sadiay Ifugao a sinaruno ti panakaisuko ti uppat a paltog sadiay Apayao ken panakaisuko ti saggaysa a paltog sadiay Abra ken Mt. Province.
Nabigbig dagiti tallo nga indibidual a nakemmeg babaen iti nagsisina a search warrants a da Alex Ahuyan ti Aguinaldo, Ifugao ken da Ayyongo Banya-ao ken Daniel Dolnagon ti Tanudan, Kalinga.
Maibasar iti listaan ti Cordillera PNP, dagiti nakumpiskar ken naisuko a paltog ket bukbuklen ti revolver, M1 rifle, caliber 30, shotgun, caliber 45 pistol ken nagduduma a bala para iti nagduduma a kita ti paltog.
