Indeklara ni Russian President Vladimir Putin idi kalman ti tallo nga aldaw a “ceasefire” wenno panagsardeng ti gubat kontra iti Ukraine inton sumaruno a bulan a mangmarka ti maika-walo pulo nga anibersario ti panagballigi ti Soviet Union ken ti kaalyadona iti World War Two.
Mangrugi ti panagsardeng ti gubat manipod Mayo a otso agingga iti Mayo a diez.
Nakalanad iti statement a nu adda dagiti panaglabsing manipod iti benneg ti Ukraine, dagiti armado a puersa ti Russia ket mangipaay iti umdas ken epektibo a pammales.
Iti agdama, awan pay ti sungbat ti dadaulo ti Ukraine seknan iti nasao a banag.
Ti panangideklara ni Putin iti nasao nga addang ket kasaruno ti panangbabalaw ni United States President Donald Trump iti napasamak a panagatake ti Russia idiay Kyiv, Ukraine idi napalabas a lawas.
