BAGUIO CITY – Nakemmeg ti tallo a baro a nagpanggep nga agiserrek iti marijuana ditoy Baguio iti control checkpoint sadiay Magsaysay Avenue, Baguio City idi rabii kalman.
Nabigbig dagitoy a da Manuel Sanchez Balbuena, 22-anyos; ni Kasmir Vince Gile, 28-anyos ken Keihl Gio Baniqued, 22-anyos, bin-ig a residente ti Baguio City.
Maibasar iti report, nakaawat dagiti pulis iti impormasyon seknan iti lugan nga addaan plaka a ZHX-404 a naglaon iti marijuana a nagtaud iti La Trinidad, Benguet.
Dagos a nangisayangkat dagiti operatiba ti PNP ken PDEA checkpoint iti nagbeddengan ti Baguio ken La Trinidad ken sadiay a pinarada ti nasao a lugan.
Nupay kasta, saan a simmardeng ti lugan ken pinartakan pay ti driver ti nangipataray iti daytoy paturong iti siudad ngem napasardeng daytoy iti checkpoint iti sangwanan ti maysa a hotel iti Magsaysay Avenue.
Iti panangsukimat dagiti operatiba iti lugan, nakita ti uppat a balkot ti marijuana ken ti tallo pay a balkot ti marijuana iti maysa a bag dagiti pasahero ti lugan.
Dumanon iti agarup nasurok pito a kilo ti kadagsen ti nakumpiskar a kontrabando ken aggatad iti P840,000.
Naipasidong iti drug test dagiti tallo gapu iti nakita a pagilasinan nga adda dagitoy iti impluwensia ti iligal a droga.
Sumangsangon dagitoy iti kaso a panaglabsing iti Comprehensive Dangerous Drugs Act of 2002.
