BAGUIO CITY – Malamlamayan ita ti tallo nga indibidual kalpasan a pimmusay dagitoy gapu iti nairamananda a tallo a nagsisina nga insidente iti tallo a probinsia ti rehion Cordillera.
Immuna a pimmusay ni Jovito Castañeda Taeza a.k.a Bitong kalpasan a pinalpaltogan daytoy ti dua a saan pay a nabigbig a suspek a nakalugan iti motorsiklo sadiay Dolores, Abra.
Naamuan nga agbisbisikleta ni Taeza iti kalsada iti ruar ti balayda idi pinalpaltogan daytoy dagiti suspek ken sadiay a natamaan ti ulo ken tiyanna.
Dagus a naitaray daytoy iti pagagasan ngem naideklara a dead on arrival bayat a narekonber manipud iti crime scene ti lima a basyo ti bala ti caliber .45.
Pimmusay met ti 6-anyos a ni Khiezer Rein Dawang Ringor kalpasan nga aksidente a naatalan daytoy ti maysa nga elf truck a naglaon ti chicken dung sadiay Buyacaoan, Buguias, Benguet.
Naamuan a paturong ti nasao a trak sadiay Bontoc, Mt. Province ken bayat a dumaldalyasat iti Halsema Highway kagiddan ti ubing a magmagna iti igid ti kalsada, killaat a timmaray ti ubing paballasiw iti kalsada.
Nupay kasta, aksidente a nadungpar ti trak ti nasao nga ubing a nangitunda tapnu madunor ti barukong ken ulona ken idi naitaray iti pagagasan ket naideklara daytoy a dead on arrival.
Pimmusay pay ni Sampaga Dick Zita Oggie, 33-anyos ken residente ti Tabuk City, Kalinga kalpasan a nakadinnungpar ti imanmanehona a motorsiklo ti maysa pay a motorsiklo sadiay Tabuk city, Kalinga.
Naideklara a dead on arrival ti nasao a biktima bayat a nagsagrap iti dunor iti nagduduma a paset ti bagina ti driver ti maysa pay a motorsiklo.
