BAGUIO CITY – Temporaryo a nairikep ti tallo nga isolation centers ti Baguio a masarakan sadiay Teodora Alonzo Street.
Sigun kenni City Health Officer Dr. Rowena Galpo, paset daytoy ti cost cutting measures wenno panag-inot ti lokal a gobyerno ti Baguio, nangruna iti panakakissay ti gastos ti siudad iti panakamintinir dagiti isolation centers nga aglaon iti limitado a bilang dagiti pasyente.
Maipalagip a nailukat dagiti nasao a pasilidad idi killaat a ngimmato ti kaso ti COVID-19 iti siudad kas resulta ti agresibo a contact tracing ken expanded testing.
Nupay kasta, linawlawagan met ni Mayor Benjamin Magalong a mailukat latta dagiti nasao nga isolation centers iti kanito nga adda ti tumaod a pagkasapulan.
Innayonna a mauray pay ti panakakompleto ti panag-quarantine dagiti pasyente a naiturong kadagiti nasao a pasilidad sakbay ti temporaryo a panakairikep dagitoy.
