BAGUIO CITY-Pimmusay ti tallo nga ubbing kalpasan a nalmes dagitoy iti nagduduma a drowning incidents iti rehion Cordillera idi Biernes, April 14.
Napasamak ti maysa kadagiti nasao a kaso iti paset ti Chico River sadiay Brgy. Bantay, Tabuk City, Kalinga a nakatayan ni Precious Garlitos Delacruz nga agtawen iti lima a residente ti San Juan, Tabuk City.
Maibasar iti report, naudi a nakita ti nasao nga ubing iti igid ti karayan nga agay-ayam ngem kalpasanna ket adda ti nakita a malmalmesen daytoy isut gapuna a naitaray daytoy iti ospital ngem naideklara a dead on arrival.
Kabayatanna, napasamak met laeng sadiay Tabuk City partikular sadiay Avogado Creek iti barangay ti Balong ti maikadua nga insidente a nakayatan ni Sarah Jane Cabututan nga agtawen iti 11.
Maibasar iti report, aglanglangoy ti biktima ken dagiti gagayyem daytoy idi nalmes daytoy iti adalem a paset ti nasao a karayan.
Pinadas pay dagiti concerned citizen nga ispalen ti biktima ngem naideklara met laeng daytoy iti pagagasan a dead on arrival.
Kabayatanna, pimmusay met ti ubing a managan iti Iknow Noskcaj Sagandoy Bassiwa nga agtawen iti uppat kalpasan a nalmes daytoy sadiay Sitio Laplapga, San Juan Norte, Manabo, Abra.
Maibasar iti report, killat lattan a nagpukaw ti biktima kabayatan nga agpikpinik ti pamilia daytoy iti igid ti Abra River.
Babaen iti panagtitinnulong dagiti residente ket nasarakan ti nasao nga ubbing ngem maysan daytoy a bangkay..
