BAGUIO CITY–Naipilan dagiti kaskenan a kaso kontra kadagiti tallo a suspek iti panagpabettak sadiay La Paz, Abra a nakatayan ti dua a pulis ken nakadangran ti 26 a dadduma pay.
Nabigbig dagiti tallo a suspek a da Joel Millare Balucas, Roel Escalante ken Eljay Biyang ken dagitoy ket sumangsangon iti kaso a dua a bilang ti murder ken multiple frustrated murder.
Naipila dagiti kaso iti Office of the Provincial Prosecutors Office sadiay Bangued, Abra.
Sigun kenni PCSupt Edward Carranza, dadaulo ti Cordillera PNP, ti nagtitipon a panagtrabaho ti nabukel a Regional Special Investigation Task Group ti nangitunda iti nasao a development iti kaso.
Nagyaman met daytoy iti publiko gapu iti suportada iti imbestigasyon a nangitunda iti panakaipila dagiti kaso kontra kadagiti suspek.
Maipalagip a manaarimaan ti fireworks display iti plaza ti La Paz kas paset ti festibidad dagitoy idi napasamak ti panagbettak a nangitunda iti ipupusay da PO3 Carlos Bocaig ken PO2 Frenzel Buneng Kitoyan.
