BAGUIO CITY-Nakemmeg ti tallo nga indibidual gapu iti panagtakawda iti lako ti maysa nga stall sadiay Block 3, Hilltop, Baguio City idi kalman
Nabigbig dagitoy a da Catherine Thomas De Guzman, 27-anyos, balasang, awanan trabaho, residente ti San Antonio, Aurora Hill ken ni Rose Ann Sanchez Quito, 18-anyos, balasang, awanan trabaho, residente ti Ambiong Road, Baguio City bayat a ti maikatlo ket maysa a dose anyos a menor de edad a babae a maikonkonsidera a Child In Conflict with the Law (CICL).
Maibasar iti report, nagturong dagiti suspek iti stall ni Alejandro Pasi Jr. sadiay Block 3, Hilltop ken nagpamarang dagitoy a kustomer.
Kalpasanna, nakita ti biktima a mapukpukawen ti lakona a dua a pidaso ti beach short pants ken maysa a pidaso ti cargo pants a nangitunda tapnu birukenna dagiti suspek.
Nakitana met ti suspek a ni De Guzman a nakaiggem iti maysa kadagiti mapukpukaw a lako isut gapuna a nagpatulong daytoy iti Public Order and Safety Division para iti panakakemmeg ti suspek.
Intudo met ti nasao a babae ti ayan dagiti dua a kakaduana sadiay Otek Street a nangitunda met iti panakakemmeg dagitoy ken iti panakarekober dagiti tinakawda a lako.
Naibalud da De Guzman ken Quito bayat a naipaima iti DSWD ti menor de edad para iti panakaipasidong daytoy iti counseling
