BAGUIO CITY – Agpapaimbag ti tallo nga indibidual a nadangran iti panakatinnag ti naglugananda nga elf nga addaan iti plaka a WBS 968 sadiay Sitio Pakpakitan, Natubleng, Buguias, Benguet idi kanikadua.
Nabigbig dagitoy a da Freddie Tapya, 40, driver ti nasao nga elf ken dagiti pasaherona a da Johnson Ramon Carte, 19, tubo ti Decoliat, Aurora Province ken maysa a managan iti Jordan Lumodao.
Maibasar iti inisyal nga imbestigasyon ti Buguias PNP, paturong kuma ti nasao a lugan ditoy siudad ti Baguio idi natinnag daytoy iti tallopulo a metro ti kaunegna a rangkis.
Dagus met a tinulongan dagiti maseknan nga umili dagiti biktima ken inturongda iti Atok District Hospital sadiay Sayangan, Atok, Benguet ngem naiyakar ni Lumodao iti Baguio General Hospital para iti kanayunan a medical treatment.
Imimbestigaran met ita dagiti pulis nu anya ti rason ti nasao nga aksidente.
