BAGUIO CITY – Natiliw ti tallo a turista kalpasan a nakumpiskar kadakuada ti dumanon P1.44-M a gatad dagiti marijuana iti naisayangkat a checkpoint/interdiction operation sadiay Poblacion, Sadanga, Mountain Province idi rabii.
Nabigbig dagitoy a da Jeffrey Mateo De Guzman, 48-anyos; Allandrix Sagcal Eligio, 40-anyos ken Jerry Cunanan Salonga, 36-anyos, bin-ig a residente ti Cabanatuan City.
Nakumpiskar manipud iti luganda ti 11 a marijuana bricks ken maysa a tubular marijuana nga agdagsen iti dumanon 12 kilo bayat a naimpound ti nasao a lugan.
Maibasar iti report ti PDEA-Cordillera, naisayangkat ti operasyon kalpasan a nakaawatda iti impormasyon seknan iti panakaibiahe dagiti nakumpiskar a kontrabando.
Iti agdama, sumangsango dagiti tallo iti kaso a panaglabsing iti RA 9165 wenno iti Comprehensive Dangerous Drugs Act of 2002.
