BAGUIO CITY – Nakemmeg ti tallo a nagpammarang a turista kalpasan a nakemmegda iti maysa a check point sadiay Bugnay, Tinglayan, Kalinga gapu iti panangibiaheda iti marijuana idi kalman.
Nabigbig dagitoy a da Nelson Portugal II, 26-anyos, driver ti naaramat a lugan; Eric Fandino, 22-anyos, estudyante ken ni Jaryd Quentiro, 22-anyos, estudyante ken bin-ig a residente ti Project 6, Quezon City.
Sigun iti Tinglayan Municipal Police Station, naka-awatda iti impormasyon seknan iti panangibiahe dagiti suspek kadagiti marijuana.
Dagus a nangisayangkat dagiti pulis iti checkpoint iti nasao a lugar ken sadiay pinarada ti lugan dagiti suspek.
Nakita iti compartment ti lugan dagiti nabalkot a tubular marijuana stalks nga agdagsen iti 10,120 grams ken aggatad iti P1,265,000.
Sumangsango dagiti tallo iti kaso a panaglabsing iti RA 9165 wenno iti Comprehensive Dangerous Drugs Act of 2002.
Maipalagip nga idi laeng nabiit ket nakemmeg ti uppat a turista sadiay Mt. Province kalpasan a naduktalan ti panangibiahe dagitoy iti adu a marijuana manipud Kalinga.
