BAGUIO CITY – Dumanon iti 30 a baboy ti gagara a napapatay sadiay Sesec-an, Talalang, Balbalan, Kalinga kalpasan a nakaptan dagitoy iti African Swine Fever (ASF) virus.
Sigun kenni Balbalan Municipal Agriculturist Anita Caldingon, imbilin ti Kalinga Provincial ASF Task Force ti panakapapatay ken panakaikali dagiti nasao a baboy iti maymaysa nga abot.
Kinunana a mixed breed ti commercial white-large hog species dagiti baboy a nakapatan iti nasao a virus a taraken ti 17 a hog-raisers iti nasao nga lugar.
Dinakamatna a nagtaod ti impeksion iti maysa nga agtartaraken sadiay no sadinu, namindua a nagpositibo iti ASF virus ti taraken dagitoy a baboy babaen iti blood samples dagiti baboyda a naipasidong iti lab-test iti siyudad ti Baguio ken sadiay Tuguegarao City.
Innayona pay a nasken a mapalabas pay ti innem a bulan sakbay a mapalubusan nga agtaraken manen iti baboy dagiti umili sadiay Sesec-an, Talalang, Balbalan gaputa nasken a maipasidongda iti anti-ASF sanitizing procedure iti tunggal dua a lawas.
Impanamnama met ti Department of Agriculture – Cordillera ti tulong pinansial a maipaay kadagiti hog-raisers a naapektaran iti daytoy.
Maipalagip a daytoyen ti maikadua nga insedente a panagwaras iti ASF virus sadiay Balbalan, Kalinga.
