BAGUIO CITY – Impeksa ti grupo ti Kilusang Mayo Uno a saan nga umdas ti 30 pesos a kanayonan a sweldo dagiti mangmangged iti pribado a sektor iti rehiyon Cordillera inton umay a bulan.
Iti interview ti Bombo Radyo, kinuna ni Mike Cabangon, Lider ti Kilusang Mayo Uno- Cordillera, ti P30 a wage increase ket saan nga umdas a panggatang kadagiti kasapulan gapu ta ngimmina ti presyo dagitoy.
Impettengna a saan metlaeng nga umdas daytoy para kadagiti mangmangged nga addaan ti lima wenno nasursurok pay a miyembro ti pamilya.
Sigun kenni Cabangon, ti 30 pesos a wage increase nga inaprobaran ti Regional Tripartite and Productivity Boards (RTWBPs) ket barya ken panang-ay-ayo da laeng kadagiti mangmanged.
Dinakamatna a nu idilig daytoy iti nasurok sangaribo a family living wage ket saan pay a nagudwa.
Kinunana a saan a marikrikna ti Regional Tripartite and Productivity Boards (RTWBPs) ti rigat dagiti addaan ti nababa a sweldo gapu ta adda dagitoy iti sidong ti gobyerno.
Gapu iti daytoy, al-allukoyen ni Cabangon dagiti mangmanged iti Cordillera a mangbukkelda ti asosasyon tapno adda ti katulongan ti grupoda a mangiyebkas iti pakaseknan dagiti mangmangged nga addaan ti nababa a sweldo.//Bombo Wilmea Pacpacan
