BAGUIO CITY – Dumanonen iti 30% a traditional street lights kadagiti kalkalsada ditoy siudad ti Baguio ti nasukatan iti light-emitting diode (LED) lights kas paset ti manarimaan a LED street lights project ti lokal a gobyerno ti Baguio.
Sigun kenni Engr. Richard Molina, electrical engineer ti City Engineering Office (CEO), naponduan iti P112-M ti nasao a proyekto a manamnama a malpas ita a tawen.
Kinunana a babaen iti nasao a proyekto ket makainot ti lokal a gobyerno iti agarup 50 percent iti energy consumption apaman a makompleto ti panakasukat dagiti bulbs dagiti street lights ti siudad iti LED light bulbs.
Pinagyamanan met ni PCol. Allen Rae Co, dadaulo ti Baguio City Police Office ti nasao a proyekto ken kinunaba a makatulong daytoy kadagiti pulis nga agpatpatrolya iti rabii.
Innayonna a malapdan ti panakapasamak dagiti krimen ken aksidente kadagiti kalsada iti rabii gapu kadagiti nalawag a silaw.
