BAGUIO CITY- Nangipatungapal iti dua nga aldaw a simultaneous operations ti Police Regional Office- Cordillera a nangitunda iti panakakemmeg ti 30 a wanted person a sumangsango iti nagduduma a kaso malaksid pay iti nakemmeg a 14 a drug personalities idi Abril 19 agingga 20.
Iti report ni Pro-Cor Regional Director PCSupt Edward E Carranza a naisumitir kenni PNP Chief Oscar Albayalde, kinunana a ti panakaipatungpal ti nasao nga operasyon ket kasaruno ti pammilin ni Presidente Rodrigo Duterte a panakaipatungpal ti nainget a kampanya kontra kadagiti agim-imet iti igam.
Gapu iti daytoy, nakumpiskar ti 36 a sachet ti mapapati a shabu, nagduduma a drug paraphernalias, maysa a brick ti marijuana ken 157 nga igam ken pampabettak.
Nangitunda pay daytoy iti panakakumpiskar ti dua a of 2 shotgun, uppat a Cal. 22, maysa a Cal. 38, uppat a Mags para kadagiti nagduduma a calibers, 238 nga ammunitions para iti nagduduma a calibre ken maysa a homemade pistol.
Malaksid iti daytoy ket ada metlaeng dagiti naisurender nga igam iti probinsya ti Abra ken iti siudad ti Baguio babaen iti naipatungpal nga Oplan Katok.
