BAGUIO CITY – Nagsapatan ti tallogasut a baro a police recruits iti parade ground sadiay Camp Bado Dangwa, La Trinidad, Benguet idi kalman.
Dagiti baro a recruits ket bukbuklen ti duagasut uppat a pulo a lallaki ken innem a pulo a babbai a maipaayan iti ranggo a Police Officer 1 (PO1) iti temporary status iti makatawen.
Iti panagbitla ni Police Regional Office Cordillera Regional Director Police Chief Superintendent Elmo Francis Sarona, kinunana a namnamaenna nga agbalin a pagwadan dagiti nasao a pulis iti amin a miembro ti organisasyon, kangrunaanna iti panangipanamnamada iti linak ken kapia, malaksid iti panangprotektarda iti karbengan ti tunggal umili.
Maipasidong dagiti baro a PO1s iti Public Safety Basic Recruit Course iti las-ud ti innem a bulan, ken sarunoen ti Field Training Program sakbay nga agbalin dagitoy a permanente a PO1.
