BAGUIO CITY – Agtultuloy ti panangsuportar ti Commission on Higher Education (CHED) kadagiti mannursuro ti Higher Education Institutions (HEIs) iti rehion Cordillera para iti panag-upgrade dagitoy.
Iti panakiuman ti Bombo Radyo Baguio, impannakkel ni CHED-Cordillera Regional Director Dr. Demetrio Anduyan Jr. nga iti baet ti agdama a pandemya ket adda latta ti scholarship grant nga ipapaay ti ahensia kadagiti mannursuro ti pribado ken parapubliko a kolehio iti pagilian.
Kinunana a naala ti rehion Cordillera ti nakaala ti kadakkelan nga slot para iti panagadal dagiti faculty members.
Dinakamatna a nasurok iti 300 nga slots ti sholarship program ti naala ti rehion nga inaprobaran ti en banc ti CHED idi kalman.
Sigun kenkuana, agala ti masters ken doctorate dagiti benipisaryo a mannursuro.
Innayonna a babaen iti scholarship program para kadagiti faculty members ti HEIs ket mapataud dagiti de-kalidad a mannursuro a mangipangato met iti kalidad ti edukasyon iti rehion Cordillera.
