Impablaak ti Department of Information and Communications Technology (DICT) itay nabiit a naduktalanda ti agarup tallo pullo a ribu a vulnerabilities iti agarup dua a ribu a digital assets ti gobierno.
Sigun kenni Jeffrey Ian Dy, Undersecretary ti Department of Information and Communications Technology (DICT), naaramid ti panakadiskubre babaen iti Project Secure Online Network Assessment and Response System wenno Automated Vulnerability Assessment nga addaan ti panggep a manglapped iti adu a hacking incidents dagiti website ti gobierno.
Gapu iti dayta, kiniddaw ti Department of Information and Communications Technology (DICT) kadagiti ahensia ti gobierno a mangituding iti focal person a tumulong a mangtaming kadagiti digital vulnerabilities ti departamentoda.
Nupay kasta, iti baet ti saan a nasayaat a kasasaad ti digital assets dagiti ahensia ti gobieno, impasigurado ni Dy a mabalin a marisut daytoy iti kabiitan a panawen.
Iti agdama, naipaay kadagiti amin nga ahensia ti gobierno dagiti naduktalan a vulnerabities kadagiti digital assets dagitoy para iti dagus nga aksion.
