BAGUIO CITY – Agtultuloy a maob-obserbaran ti kasasaad ti 31-anyos a lalaki a natnag iti maysa a hotel iti siudad ti Baguio idi kalman, Enero 16, 2026.
Iti interview ti Bombo Radyo iti Baguio City Police Office, ti biktima ket maysa nga OFW nu sadino kagapgapuna idiay Taiwan.
Manipud iti NAIA, agturong koma daytoy idiay Tuguegarao idi kalman babaen iti connecting flight.
Gapu ta walo nga oras ti nasken nga urayenna sakbay ti flight paturong idiay Tuguegarao, binalakadan dagiti kapamilyana nga aguray daytoy iti airport ken dayta metten ti naudi a komunikasyon dagitoy.
Sigun kadagiti awtoridad, saan a ninamnama ti maseknan a pamilya a nakadanun ti kapamilyada iti siudad ti Baguio a nakapasamakan ti insidente.
Maibasar met iti CCTV footage a naala dagiti awtoridad, saan a nagcheck-in ti biktima iti hotel a nakatnaganna.
Nakita pay dagiti kagawaan ti biktima iti ruar metlaeng ti hotel.
Nakita pay iti CCTV a nagpagnapagna ti biktima iti ruar ti hotel ken napan pay iti balcony iti maikappat a kadsaaran.
Adda met ti nakakita a witness a nakatugaw ti biktima iti balcony ti hotel sakbay a napasamak ti insidente.
Nagsagrap ti biktima iti multiple fractured iti nagduduma a paset ti bagina.
Iti agdama ket agtultuloy pailaeng ti imbestigasyon dagiti awtoridad iti napasamak nga insidente ngem sigun kadakuada ket awan ti napasamak a foul play.//via Bombo Noveh Grace Organo
