BAGUIO CITY – Dumanon iti 31 nga OFWs a nagsubli ditoy rehion Cordillera ti nagnumar iti Project EASE wenno iti Educational Assistance through Scholarship in Emergencies.
Sigun kenni Overseas Workers Welfare Administration – Cordillera Supervising Administrative Officer Edgar Melchor Laigo, panggep ti Project EASE a maipaayan iti educational assistance dagiti kwalipikado a college-level dependents dagiti OFWs nga aktibo a miembro ti OWWA ngem naapektaran met ti panggedanda gapu iti agdama a pandemya.
Saksakupen ti proyekto ti tinawen a panakaited ti sag-P10,000 iti uneg ti uppat a tawen iti kwalipikado a benipisaryo.
Maibasar iti kaudian a datus ti OWWA-Cordillera iti Project EASE, 137 ti aplikasyon a naawatda para iti daytoy ngem 45 paylaeng ti naaprobaran, 32 ti nakapila, 18 ti naibasura ken 42 ti maur-uray a maaprobaran.
Innayonna a mabalin metlaeng nga agaplikar dagiti kwalipikado nga OFWs iti Tabang OFW aid grant no sadino, daytoy ket one-time P30,000 cash aid manipud CHED ken DOLE para kadagiti kwalipikado a college students a dependents dagiti OFWs nga apektado iti pandemya.
Linawlawagan pay ni Laigo a saan a dagus a maaprobaran ken maited dagiti nasao a tulong pinansial gaputa magna ti aplikasyon iti proseso.
