Agtultuloy latta ti panangiyimplimintar dagiti otoridad iti Anti-Mendicancy Ordinance iti Baguio City nga idadauloan iti City Social Welfare and Development Office ken iti Baguio City Police Office.
Iti panakiuman iti Bombo Radyo kenni Police Major Marcy Marron, panakangiwat iti Baguio City Police Office, nangrugi ti panangkumbinsirda kadagiti agpalpalama idi Disyembre idi napan a tawen.
Naobserbaran nga adu dagiti agpalpalama nangruna kadagiti nalalatak a pagpasyaran iti siudad kas iti Session Road a pagturturungan dagiti adu a tao.
Iti agdama, tallo pulo ket maysa nga agpalpalama ti naipasidong ita iti kustodiya dagiti kapulisan ken iti Social Welfare and Development Office.
Imbinglay ni PMaj. Marron nga iti nasao a bilang dagiti tiniliwda ket awan kadagitoy iti nakilaban wenno nangkontra kadagiti otoridad.
Manamnama met a maberipikar ti agpayso a nagtaudan dagiti mendicants tapno maisublin wenno mapaawiden dagitoy.//Bombo Noveh Organo
