Pimmusay ti dua nga indibidual iti napasamak nga aksidente sadiay Alanod, Kabayan ita nga aldaw.
Iti panakiuman ti Bombo Radyo kenni Police Liuetenant Crizaldy Calpito manipud Kabayan Municipal Police Station, kinunana a self-accident ti napasamak wenno nagsarili ti truck kabayatan ti panagdalyasatna iti pababa a kalsada.
Sigun kenni Police Liuetenant Calpito, tallo nga indibidual ti nakalugan iti nasao a truck ken daytoy ket nakakarga iti backhoe bayat a paawidda sadiay Alanod, Kabayan.
Kinuna met ni PMSg. Aaron Lee Dulipas a nakaawatda iti awag iti oras ti pasado alas dies iti agsapa ngem mapatta-patta a natumba ti truck iti oras ti alas nuebe ti agsapa.
Iti panagresponde dagitoy, nadanonda dagiti biktima iti nasao a truck ken babaen iti tulong ti Bureau of Fire Protection ken ti Rural Health Unit ket naitarayda ti dua nga ubbing iti pag-agasan.
Sigun kenni PMSg. Dulipas, dead on the spot a pimmusay ti 33-anyos a drayber ti truck bayat a naitaray iti pagagasan sadiay Daclan, Bokod ti 9-anyos a babai nga ubbing ngem pimmusay met laeng daytoy.
Kabayatanna, ti 22-anyos a lalaki a kadua dagitoy ket naitaray iti Baguio General Hospital and Medical Center ken manarimaan nga agpatpataming.
Innayon ni Police Liuetenant Calpito a saan a daytoy ti umuna a gundaway a napasamak ti aksidente iti nasao a lugar nangruna ket slope wenno pababa ti kalsada.
Nagpalagip pay ti nasao nga otoridad kadagiti amin a motorista a kitaenda a nalaing dagiti lugan dagitoy sakbayda nga agbyahe wenno ti blowbagets kasta met nga agganad dagitoy nangruna ket panagtutudo ken no mamingsan ket foggy sadiay Kabayan.
