Balligi a naispal ti 34 a crew member ken 33 a pasahero kalpasan a nauram ti barko nga MV Roro Master a nagluganan dagitoy iti sangladan idiay Abra de Ilog, Occidental Mindoro itay agsapa, April 09, 2025.
Ti nasao a passenger ship ket addaan iti karga a 67 nga indibidual.
Sigun iti Philippine Coast Guard (PCG), manarimaan ti panagkarga ti nasao a barko kadagiti pasahero ken cardo para iti naituding a panagbiahe dagitoy a paturong idiay Batangas idi killat a nag-apoy ti deck generator a paset ti nasao a barko.
Dagus met a nangipatulod ti Philippine Coast Guard iti personnel manipud iti Coast Guard Sub-Station Abra de Ilog kasta dagiti ship officers ken crew babaen iti koordinasion dagitoy iti vessels damage control team tapno masebseban ti nasao nga uram.
Babaen iti nagtipon a puersa dagitoy ken dadduma pay nga ahensia
Naideklara ti fire out iti pasado alas nueba itay agsapa.
Mainaig iti dayta, balligi metlaeng a naispal dagiti 21 a rolling cargoes manipud iti nasao a barko.
Kinumpirmar met ti Philippine Coast Guard nga awan ti nadangran iti napasamak nga insidente.
Manarimaan metten ti imbestigasion dagiti otoridad iti rason ti napasamak nga uram.
Kabayatanna, nakikoordinar ti Coast Guard Station Occidental Mindoro iti Maritime Industry Authority sadiay Calabarzon (Marina IV-A) tapno irekomendarda ti temporario a pannakasuspende dagiti dokumento ti barko bayat a maur-uray ti resulta ti komprehensibo a safety inspection daytoy.
