ABRA – Napalpaltugan ti 34-anyos a mannalon bayat ti lamay idiay Multawi, Pacac, Dolores, Abra itay parbangon.
Ti biktima ket ni Dave Guzman Millare, residente ti Lingtan, Bangued, Abra bayat a ti suspek ket ni Alex Ola, 46-anyos, mannalon ken residente ti Kalading, Pacac, Dolores, Abra.
Maibasar iti inisyal nga imbestigasyon, nakaawat iti awag ti Dolores Municipal Police Station pasado alas dos itay parbangon maipapan iti napasamak a pammaltog iti lamayan idiay Multawi, Pacac, Dolores, Abra a dagus met a nirespondean dagiti otoridad.
Naduktalan a nag-iinom ti biktima ken ti suspek agingga a saanda a nagkinnaawatan a nangitunda iti pannakapalpaltog ti biktima iti namin-tallo a daras.
Naitaray met ti biktima iti ospital para iti pannakaagas daytoy bayat a manarimaan ti panangtiliw dagiti otoridad iti naglibas a suspek.
Iti interview ti Bombo Radyo, kinuna ni PLTCOL. Daniel Pel-ey, Information Officer ti Abra Police Provincial Office a dumanonen iti 21 ti nailistada a shooting incident idiay Abra.
Inyunay-unayna met a dagitoy nga insidente ket awan pakainaiganna iti umadanin nga eleksyon.
