Nakabalud ita ti 34-anyos a Pilipino nga agtrabtrabaho iti maysa a cruise ship idiay Amerika kalpasan a nangikabil ti hidden camera iti bathroom dagiti bisita nu sadino dadduma kadagitoy ket menor de edad.
Ti suspek kas agtratrabaho kas stateroom attendant iti Symphony of the Seas.
Maibasar iti report, inaklon ti suspek ti iligal nga aramidna partikular ti panangikabilna ti hidden camera kadagiti bathroom.
Sigun iti opisina ti Broward County Sheriff, nadlaw ti maysa a biktima a menor de edad ti hidden camera iti sirok ti lababo ti bathroom.
Dagus a naipulong daytoy iti security personnel ti cruise ship a nangitunda iti pannakatiliw ti suspek.
Kabayatan ti imbestigasyon, nakita ti ship security ti iseserrek ti suspek iti kuwarto ti biktima.
Idi sinukimat dagiti awtoridad ti electronic devices ti suspek ket nakitada iti sumagmamano a video dagiti nakalabos a bisita ti cruise ship pakairamanan dagiti sumagmamano a menor de edad.
Naduktalan pay nga adda dagiti gundaway nga aglemlemmeng ti suspek iti sirok ti katre tapno ma-videona dagiti sumagmamano a bisita bayat ti panagsukatda.
Sumangsango ti suspek ti six counts of video voyeurism, producing child pornography ken possessing child pornography.
