Saan a mangituntunda iti aniaman a parikut iti salun-at dagiti PDLs ti 368.75% a congestion rate sadiay Baguio City Jail Female Dormitory.
Daytoy ti kinuna ni Jail Senior Inspector Joan T. Bacayan, Acting Warden iti Baguio City Jail Female Dormitory.
Iti pannakiuman ti Bombo Radyo kenkuana, kinunana a dumanon iti lima pulo ket siam a Persons Deprived of Liberty (PDL) ti adda iti nasao a pagbaludan iti agdama.
Daytoy ket limmabes iti sangapulo ket innem a bilang ti “ideal” a bilang ti maakomodar ti Baguio City Jail Female Dormitory.
Nupay kasta, inyunay-unay ni Jail Senior Inspector Bacayan a nasalun-at latta met amin dagiti Persons Deprived of Liberty ken awan ti nakapasar iti nakaro a sakit kadakuada bayat nga adda dagitoy iti uneg ti pagbaludan.
Sigun pay iti nasao nga opisial, agtultuloy ti kanayunan a monitoring iti physical well-being dagiti PDL babaen iti pannakikoordinarda iti Department of Health.
Iti baet a nabasara ti panawen, kinuna ni Bacayan a makaturog met a nasayaat dagiti Persons Deprived of Liberty iti laksid a nangato ti congestion rate ti nasao a pasilidad.
Kabayatanna, mangnamnama isuna ken ti nasao nga opisina a dakkel ti maitulong ti plano ti gobierno a pannakaipasdek ti baro a pagbaludan sadiay Brgy. San Luis Baguio City nu sadinno, mabalin a maakomodarna ti sangagasut ket lima pulo a bilang dagiti Persons Deprive of Liberty (PDL).
