BAGUIO CITY – Pakabuklan a 37 a gerilya ken supporters ti komunista a New People’s Army (NPA) ti simmuko iti tropa ti gobyerno sadiay Ifugao ken Mt. Province iti umuna a lawas ti Agosto.
Sigun iti military, dagiti militia ng bayan ket dagiti indibidual a direkta wenno saan a direkta a nairaman iti armado a panagrebelde ken dagitoy ket nangipapaay iti suporta iti rebelde nga NPA.
Simmuko ti 14 a militia ng bayan ken 6 a supporters dagitoy sadiay Namal, Asipulo, Ifugao idi Agosto 4 ken impaimada iti gobyerno ti maysa nga M-16 rifle.
Resulta daytoy ti peace caravans nga insayangkat ti tropa ti gobyerno iti nasao a probinsia.
Simmuko met ti kanayonan a 6 a militia ng bayan ken 11 a supporters manipud Tinoc, Ifugao idi Agosto 7.
Sigun kenni Lt. Col. Narciso Nabulneg Jr., dadaulo ti 54th Infantry Batallion ti Philippine Army, boluntaryo a simmuko dagiti nasao a kameng ti militia ng bayan ken dagiti supporters dagitoy kalpasan ti panakidayalogo dagiti unit ti military a mangisaysayangkat ti Community Support Program.
Kinunana a nakidayalogo dagiti militar kadagiti komunidad seknan iti Enhanced Comprehensive Local Integration Program (E-CLIP).
Saksakupen ti 54th Infantry Batallion dagiti probinsia ti Ifugao, Mt. Province, Benguet ken ti siudad ti Baguio.
Sinaksian dagiti umili, tribal elders, agtutubo ken ti pulisya ti panagsuko dagiti nasao nga indibidual ken ti panangisapata dagitoy iti alyansada iti gobyerno.
Puntirya met ti peace caravans ti military a maidanun kadagiti komunidad, nangruna dagiti nasusulinek a lugar iti rehion dagiti nagduduma a serbisyo ti gobyerno.
Inkari met ti militar nga ituloyda ti agtrabaho tapnu makumbinsir dagiti makakanigid a tattao ken dagiti mangsupsuportar iti rebelde a grupo iti panagsuko ken panagsublida iti sidong ti linteg.
Maipaayan dagiti nasao a surrenderees iti Immediate Assistance, Reintegration Assistance, and Remuneration for the Firearm Surrendered iti sidonf ti E-CLIP ti gobyerno.
