BAGUIO CITY – Naipangato ti rangko ti 373 a pulis iti rehion Cordillera kagiddan ti panagsapatada idi kalman.
Sigun iti Police Regional Office Cordillera (PROCOR), 5 ti nagbalin a Police Chief Inspector (PCI), 8 ti nagbalin a Police Senior Inspector (PSI), 38 ti nagbalin a Police Inspector (PI), 2 ti nagbalin a Senior Police Officer 4 (SPO4), 29 ti nagbalin nga SPO3, 2 ti nagbalin nga SPO2, 124 ti nagbalin nga SPO1, 97 ti nagbalin a Police Officer 3 (PO3) ken 68 ti nagbalin a PO2.
Kinablaawan met ni PROCOR Regional Director PCSupt. Edward Carranza dagiti nasao a pulis ken impeksana a kumpiyansana nga adda ti maaramidan dagiti nasao a pulis a panagbaliw.
Impalagipna pay kadagitoy ti panagsaganada kadagiti karit a sangwenda iti baro a rangkoda ken impalagipna met ti panangaramidda iti amin a kabaelanda tapnu makatulongda iti organisasyon ti Philippine National Police, nangruna iti laban kontra iti amin a kita ti kriminalidad.
Kagiddan ti panagsapata dagiti pulis a naipangato iti rangko ket naipatungpal ti panangikabit kadagiti baro a rank insignia ken shoulder board dagitoy.
Naamuan a naipasidong iti nainget nga screening dagiti naipangato ti rangkona a pulis ditoy rehion.
