Naireklamo ti 38-anyos a lalaki, unemployed ken residente iti T. Alonzo Street, Baguio City kalpasan a dinanugna ti 24-anyos nga estudiante a complainant kalpasan a nakasali iti pagnaan.
Maibasar iti report ti pulisya, sakbay ti insidente, ti complainant ken dagiti gagayemna ket nagparada iti payparking iti uneg ti maysa a dormitory iti T. Alonzo Street bayat nga ur-urayenda dagiti dadduma a kakaduada, ken agsardeng iti tudo.
Nagtalinaed dagitoy iti ruar iti dorm ken nagtugawda kadagiti pagtuggawan, kagiddan ti panagselpon ti complainant bayat nga agur-urayda.
Idi nakatugaw daytoy iti abay iti entrance door ti dormitory nu sadinno “partially” a naka-extend iti sidewalk ti sakana a nakasali iti pagnaan, limmabas ti suspek wenno ti mairekreklamo ngem saan a nadlaw ti complainant gaputa saan a nagsasao ti suspek.
Kalpasan a napanunot ti complainant nga adda ti limmabas ket insimpana ti sakana.
Sumagmamano a minutos ti napalabas, nagsubli ti suspek ket dinillawna ti complainant.
Nagpalawag met ti complainant a saanna a nadlaw ti panaglabas iti suspek ngem nagtuloy latta ti panagsinnungbatda.
Ginandat met ti complainant a dumawat ti pammakawan ngem kinarit ti suspek.
Iti CCTV footage, nakita ti panagdanug iti suspek iti rupa iti complainant a nangitunda iti panagdara iti bibigna.
Nangibales met ti complainant ngem saan a nakaro a nadunor ti rupa ti suspek.
Naganawa met ti kakadua iti suspek ngem nupay kasta nagtultuloy ti panagsinnungbat ti dua.
Naiturong metten ti complainant iti nakaparada a lugan daytoy ngem maatap a sinugod ti suspek nga addaan iti imet a kutsilyo ngem saanna nga intutok.
Nabaelan met ti manager ti dorm a marestrain iti suspek.
Nagturong met ti BCPO-Police Station 7 ti complainant tapno agpatulong ken naibilin ti panagpataming iti ospital para iti medico legal certificate.
Iti kaudian a report, nagkiddaw met ti complainant a mairefer iti kaso iti maseknan a barangay. | via Bombo Noveh Organo
